Thursday, December 31, 2009

Four Seasons

اللي بعرفه انه البني آدم بمر خلال اليوم  أو خلال فترة من الزمن بـ"أربع فصول"
و اللي بعرفه أنه ما بنحكم على أي بني أدم أنه منيح أو عاطل إلاّ بعد ما نشوف أكتر فصل بطول عنده!
يعني ممكن فصل الشتاء يكون أطول من الصيف عنده! حسب تفكيره هو و الطريقة المأسس عليها مخه!

عشان أبسط الصورة بدي أذكركم بهالقصة:
 هاد في زلمة عنده أربع شباب حب يعلمهم انهم ما يحكموا على الأمور بسرعة!
فبعت كل واحد فيهم عند شجرة وحدة بس كل واحد بفصل
يعني الأول راح بالشتاء
التاني راح بالربيع
التالت راح بالصيف
و الرابع راح بالخريف!
و بعد ما كلهم راحوا و رجعوا , جمعهم الأب و سأل الأول (اللي راح بالشتاء) شو كيف كان وضع الشجرة؟!!
رد عليه: والله اسكت هالشجرة بتخزي!! ناشفه و مايلة و حالتها حالة!!
و سأل التاني (اللي راح بالربيع) : و انت يا عاهه كيف شفت الشجرة؟
رد عليه: ييييي اسكت بتجنن ! مزهرة و خضرة!
و سأل التالت(اللي راح بالصيف): و انت؟!! احكيلنا كيف شفت الشجرة؟
رد عليه: ابييه ضلليت قاعد تحتيها و الهوا بياخد العقل و هي خضرا و ريحتها بتجنن!!
و سأل التالت(اللي راح بالخريف): و انت يا مشطوب دورك احكيلنا شو شفت؟!
رد عليه: والله يابا الشجرة شكلها كان كتير حزين و مصفرنه!

كلهم شافوا نفس الشجرة بس كل واحد شافها بمزاج غير عن التاني!!
و هيك الناس!! ممكن يكونوا مرة زعلانين و مرة معصبين و مرة مبسوطين و مرة حالتهم حالة! حسب الـ "Mood"!
و برضه احنا مو لازم نعلق الآمال على الأشياء اللي بتصير معنا!!
اليوم نكد  و بكرة أنكد بس إلاّ ما يجي يوم يكون مش نكد!!

المصيبة في الناس اللي فصول السنة عندها كله شتا و خريف!! الله يعينهم!!



Wednesday, December 30, 2009

محتار

حاسس حالي عم أرجع لورا!!
و هاد شي كتير ضاغطني!!
كان موقعي في الشغل الأولاني غير هيك!!
صرت اتنازل كتير عن حقوقي!!
متلا عم استخدم اللاب توب الشخصي عشان امشي شغلي!
و كتير اشياء!


بخطر في بالي أرجع عالشغل القديم و أعلن فشلي الذريع في شغلي الجديد و أنسحب!! و صوت جواي بحكيلي استمر بكرة الأمور بتتغير!!
اليوم ناداني المدير الجديد بسألني انه شو مدى فضاوتي في الشغل! حكيتله احيانا بفضاش ثانية و أحيانا طول الوقت فاضي!!
حكالي عندك استعداد تتعلم شي جديد؟! حكيتله yes عندي
حكالي فكر في الموضوع و ردلي خبر:)


فكروا معي يا جماعة!!

Saturday, December 19, 2009

Virus-B




كل شركة و كل شلة اصحاب و كل تجمع ألا ما يكون فيها واحد مصاب بـ Virus-B!!
مواصفات الشخص المصاب:
1- متشائم
2- ثرثار
3-يدمر احلام و طموحات الآخرين
4- معدي في بعض الأحيان
5- كل الناس غلط و هو صح
6- ممنوع حد يشتغل و هو موجود
7- أناني
8- دايما بقلبها مسخرة!!

ممكن كل المواصفات تجتمع فيه! في هاي الحالة يرجى أخذ الحيطة و الحذر!! لأنه هاد بكون صايبه أخطر أنواع الـ Virus-B!!

تسألونيش شو يعني B و من وين أجت! فش داعي للإحراج!!

العلاج: لا يصلح العطار ما أفسده الزمن.. راحت عليه المسكين!!

بالمناسبة طحونتي بتوجعني و مش عارف احكي كتير فسلام!

Thursday, December 17, 2009

الكأس الفارغ



ما أكتر الفهمانين في هالدنيا! بس هل كل الفهمانين فهمانين ولا بدعوا الفهم؟!
و إذا بدعوا الفهم على اي اساس؟ خبرتهم بالحياة؟ ولا شهاداتهم العلمية؟!
الناس الفهمانين هدول مستعدين انهم يتقبلوا اي معلومة جديدة ولا اكتفوا بالبلاوي اللي عندهم؟!
في حال انهم اكتفوا لأي درجة من الفهمنة وصلوا؟!
في حال انهم ما اكتفوا هل من الممكن أنهم يفرغوا كاستهم؟!
هل العمر مقياس معتمد للخبرة في أي شي؟ مثالا في الحياة؟

نظرية الكأس الفارغ

نظرية صينية بتقيس مدى تقبل الشخص للتعلم

مرة واحد حب يتعلم اليوغا, و بعد ما دور على شي مدرسة يتعلم فيها اليوغا و لقاها, حكوله في 3 امتحانات لازم تنجح فيهم و معك 3 محاولات..
الأمتحان الأول : تنظيف الأرض
الأمتحان التاني: تنظيف الزجاج
الأمتحان التالت: قص العشب

إجو الجماعة تاعون المدرسة يعلموه كيف ينظف الأرض و ينظف الزجاج و يقص العشب.. الزلمة عمل حالة فهمان و حكى الكلمة الأكثر انتشارا بعرف!!
أوكي بتعرف بتعرف ورجينا شطارتك!!

المدرسة من قوانينها انه ما بتحكي سبب الرسوب الا بعد ما يخلصوا التلات محاولات!!
و صاحبنا رسب بالأمتحانات بجدارة و خلصوا محاولاته التلاته و راحت عليه!!

و دخل على مكتب مدير هالمدرسة ليعرف سبب رسوبه في التلات محاولات و صار بينهم النقاش التالي!

هو: ممكن اعرف ليش رسبت انا؟
المدير: شو تشرب؟
هو: شكرا ما بدي اشرب شي بس بدي اعرف انا ليش رسبت ؟؟
المدير: أحنا من عادتنا اللي برسبوا لازم يشربوا شي قبل ما يعرفوا ليش رسبوا!! فشو تشرب؟ شاي؟!
هو: يا سلام!! اوكي شاي!!
وصى له على شاي و اجى الشاي و بلش المدير يصب شاي للزلمة!
المدير: انت من وين؟
هو: من ...... أي بلد عربي!!
و كم سؤال على كم جواب لحد ما امتلت كاسة هالشاي و صارت تكبكب حوليها
هو: يا عمي شو بتسوي انتبه وسخت الدنيا و عبيت الأرض شاي!!!!! (بصرخ طبعا)
المدير: شايف كاسة هالشاي؟ زيك بالزبط!! انت كاستك مليانة و شو ما حطينا فيها ما رح نستفيد لأنه فش عندك مجال لأضافة اي معلومة او شي و اذا حاولنا انه انضيف معلومة رح تصير تناقش نقاش فاضي و تعطلنا عالفاضي و توسخ الدنيا!!
فضي كاستك يا محترم و تعال!! الله معك و خد الباب وراك!!

و انتوا كمان حاولوا انكم تفضوا كاستكم كل يوم الصبح و كل ما حبيتوا انكم تتعلموا شي جديد من اي حدا افهم منكم او اتيس منكم لأنه مهما فهمتوا او كنتوا فهمانين الا ما يكون لو 0.000000001 % ضايع من عندكم

بغض النظر عن المصدر اتمنى انه كلامي عجبكم او استفدتوا منه لو 0.000000001 % !!

والسلام

Wednesday, December 16, 2009

مقهور

اليوم أول مرة بوصل الشغل متأخر!! و أول مرة مديري ببهدلني من أول ما داومت في هالشركة.. بصراحة بستاهل البهدلة!!
بهدلته خففت عني شوي تأنيب الضمير!!.. و بينت لي امور كانت غايبة عن عيني...

امبارح صاحبي كان مريض و رحت نمت عنده و راحت علي نومه هاد اللي أخرني!!

و مديري عرف انه نومتي عند صاحبي هيي اللي أخرتني..

حكالي آخر شي ممنوع تنام برة بيتك و الناس الفاشليين و الLosers إبعد عنهم!!
طبعا مديري كان مديري أيام ما كنت أشتغل و انا في الجامعة!! من 10 سنين تقريبا!!
و رجع من شهرين مديري مرة تانية!!
و هو من الناس اللي بنقدر نحكي عنهم عصاميين!! لأنه فعلا بدأ حياته من الصفر و هلأ صار عنده مصنعين, واحد بالأردن و واحد بالأمارات!! و بصراحة أنا كتير بحبه! و "إحساسي" بحكيلي انه هو كمان بحبني و الله أعلم!

جد أنا كتير مبسوط أنه هو مديري و اللي قاهرني أنه رح يجيب مدير جديد و هو رح يرجع للشغل بالسوق.. الله يستر :(

سلام!

Monday, December 14, 2009

مي و كهربا

والله الفلوس آخر همي!! و انا بني آدم مصرفجي!! يعني للأسف القرش ما إله قيمة عندي!
أنا صارلي تقريبا شهرين في الإمارات!! أول ما إجيت الشركة امنتلي سكن مؤقت مع واحد و بلغته الشركة انه انا ضيف مؤقت عنده لحد ما يستأجرولي سكن و يفرشوه!! و بلغته الشركة انه في هالشهر اي فاتورة ماء او كهربا الشركة رح بتدفع النص!!


خلص الشهر و خلصت الفيزا و صار لازم ارجع عالأردن عشان أعدل وضعي و أرجع بفيزا عمل!!
خلال هالشهر الزلمة كان عم بحضر حاله انو يجيب مرته و ولاده عنده!!
و قرر انه اليوم اللي انا بسافر فيه بعدها في يوم هم ييجو!
تعركست معو الأمور و ما قدر يحجز لأنه السعر اللي حصله غالي!!
ساعدته و جبتله سعر منيح!!
و تعركست معو الأمور مش عارف كيف بده يبعت الفيزا  لأهله في الأردن لضيق الوقت!!
حكيتله انا باخدهم معي و بعطيهم لأهلك بس اوصل الأردن!!
تاني يوم رحت عالمطار و للأسف راحت علي الطيارة عشان الأزمة اللي صارت الصبح عالطريق!! طريق مدتها 20 دقيقة اخدت ساعة و نص!! و بصراحة الفلوس اللي كانت معي كانت محسوبة و يادوب تكفيني بما نه في عيد و عيديات و اصحاب و طلعات و مش عارف شو!!
اتصلت فيه و حكيتله انه تعال خد الفيزا عشان رح تتأخر علي الطيارة و ما بعرف شو رح يصير معي و ما رح اطلع من المطار إلا على الطيارة!!
حكالي في خدمة الفيزا بالمطار حط الفيزا هناك و هم بس ييجو بلاقوها عندهم و قد ما يكلف ببعتلك حوالة عالأردن!!
و انا بصراحة الفلوس على قدي كانت.. حكيتله ماشي!! و كلفوني مبلغ محترم!! مش كتير محترم بس انه محترم نسبيا!!
و ضلليت في المطار لتاني يوم عشان ما تروح علي الطيارة من الأزمة !! حرمت !
و  وصلت الأردن و بالمسا حكيت معو عشان احكيله انو لا تبعت شي انت ولادك بدهم مصاريف هلأ بلا ما ازنقك!!
الحمد لله كفوني اللي كانوا معي و زاد!!
و رجعت على الإمارات و أنا نسيت الموضوع!!
امبارح بناديني و بحكيلي بدك مني فلوس و انا دفعت كهربا و مي بطلعلك من المبلغ اللي دفعته هالقد!!
اطلعت فيه و حكيتله انا مسامحك!! ولا احكيلك مش مسامحك هاتهم!!


المبدأ مش مبدأ فلوس!! يا ريت تكونوا فهمتوا النقطة اللي بدي اوصلها! لأنه جد انسم بدني و قررت ما أخدم حد مع انه الف مرة قررت هالقرار و برجع بنسى اني قررت!!


و أنا مش عارف ليش عم بكتب في هيك شي! بس والله انو مقهور و مرة تانية مش عالفلوس!!  لأنه الشركة سألته عن الفواتير و عرفت انو انا دفعت و رجعلولي المبلغ!! بس والله مقهور!


سلام!




Wednesday, December 9, 2009

مطر.. مطر.. مطر..



الساعة 4 الفجر!! عم بتشتي الدنيا .. كنت نايم و صحيت على صوته!! أحلى صحوة!!
هدوء في كل مكان! بس انا و المطر!
ولعت سيجارة و سرحت و رحت في عالم آخر!!
صابني شعور غريب أكتر شي ممكن يوصفه هو :


"عيناكِ غابتا نخيلٍ ساعةَ السحر

أو شرفتانِ راحَ ينأى عنهُما القمر


عيناكِ حين تبسمانِ تُورقُ الكروم


وترقصُ الأضواءُ.. كالأقمارِ في نهر


يرجُّهُ المجذافُ وَهْناً ساعةَ السحر...


كأنّما تنبُضُ في غوريهما النجوم


وتغرقان في ضبابٍ من أسىً شفيف


كالبحرِ سرَّحَ اليدينِ فوقَهُ المساء


دفءُ الشتاءِ فيه وارتعاشةُ الخريف


والموتُ والميلادُ والظلامُ والضياء


فتستفيقُ ملء روحي، رعشةُ البكاء


ونشوةٌ وحشيةٌ تعانق السماء


كنشوةِ الطفلِ إذا خاف من القمر"


شكرا الك يا بدر شاكر السياب.. من اكتر القصائد اللتي تهز مهد روحي!!

Monday, December 7, 2009

القدس و أوروبا!!




خبر امبارح!!

حملة فلسطينية مكثفة لاقناع أوروبا باعتبار القدس عاصمة للدولة المستقلة!!
خبر اليوم!!
إسرائيل تمارس ضغوطا على أوروبا لرفض الاعتراف بالقدس عاصمة لفلسطين!!

حملة للإقناع؟! يعني من شان الله افهموا يا بجم!
إسرئيل تمارس ضغوطا؟! يعني أيش يا نور؟! إذا بتردوا عليهم بنحرقكم!!

مش عارف من إمتى صرنا نترجى العالم عشان يعترفوا بأن القدس عاصمة فلسطين ولا لأ!!
و إمتى القدس بطلت عاصمة فلسطين!!
و شو وصلنا لهالحالة اللي إحنا فيها غير  علي بابا و 40 حرامي الي حاكمين فلسطين!!
بطلت اعرف شو عم بصير في هالدنيا!! مش فاهم اشي بصراحة!!
بس اللي بعرفه ان القدس عاصمة فلسطين و فلسطين ان شاء الله حرة عربية من البحر الى النهر و غصب عن عيون العالم!!
ما رح احكي عن الحفريات اللي عم بتصير ولا عن العالم العربي المبنج و ساكت على شو مش عارف!!
ولا عن الشهداء اللي ماتوا فدا فلسطين و بستنوا غيرهم يموت ولا لإمتى رح يضللوا يستنوا!!
و  لا عن صفقة دماء اهل غزة!! ولا عن اي شي!!

بس اللي رح احكيه نفسه اللي حكاه أحمد مطر:

"النملة قالت للفيل : قم دلكني ومقابل ذلك ضحكني!
واذا لم اضحك عوضني بالتقبيل وبالتمويل
واذا لم اقنع..قدم لي كل صباح الف قتيل
ضحك الفيل
فشاطت غضبا!
تسخر مني يا برميل؟
ما المضحك فيما قد قيل؟
غيري اصغر... لكن طلبت اكثر مني!!
غيرك اكبر ... لكن لبى وهو ذليل!!
اي دليل؟؟
اكبر منك بلاد العرب!
واصغر مني اسرائيل..!!!!"

و أعتذر أن أخطأت في التعبير!!
و السلام!

Saturday, December 5, 2009

رجعتلي الروح



ماكل هوا!! مفلوز مع اني كل 10 سنين بفلوز مرة!! بس اذا فلوزت بتوفى.. سلامتي.. بعيد الشر عني :)

مش موضوعنا.. موضوعنا اني اشتقت كتير للمطر! شعور غريب بصيبني بس اشوف الدنيا بتشتي.. لا شعوريا دموعي بتنزل زي المطر!... مش عيب الرجال تبكي! كنت لما ابكي و أنا صغير يحكولي الرجال ما بتبكي!! عيب!!

طبعا مش كل ما تشتي الدنيا ببكي!! حسب الوضع العام و الخاص!!
لازم اكون لحالي و الدنيا عتمة و ضو الشارع عاكس على المراية اللي بغرفتي و مدد بسريري و بيتنا يكون فاضي!
كأني كتير اشتقت لغرفتي كمان!
و اشتقت لأمي و هي بتصحيني الصبح ! لأروح عالشغل! طبعا طول عمري مغلبها لأمي و بكل شي! و طول عمرها بتصحيني الصبح و بتتغلب و هي بتصحي فيي!!
"يا أحمد قوم يا ماما النسكافيه تاعك برد!" طبعا هاي اكتر جملة سمعتها بحياتي:)
كنت مفكر بسفرتي اني ريحت امي من غلبتي! على فكرة أنا غلباوي كتير.. بكل شي بغلب! بس لما رجعت عالأردن عشان موضوع الفيزا سمعتها بتحكي لصاحبتها عالتلفون "لما رجع أحمد رجعت روحي معه!" و يا ريتني ما سمعتها!! الله يخليلي اياكي يا احلى أم بالدنيا..
و يخليلكم امهاتكم يا رب..
و اشتقت كمان لشغلي القديم.. و اشتقت لمخانقاتي مع مديري العزيز:))
و اشتقت كمان لأصاحبي اللي كانوا فاضحينا وين ما نروح:)
و بما إني مشتاق و مشتاق ... أشتقتلكم انتوا كمان:)

 



خائف من القمر - محمود درويش



خبّئيني. أتى القمر
ليت مرآتنا حجر!
ألف سرّ سري
وصدرك عار
و عيون على الشجر
لا تغطّي كواكبا
ترشح الملح و الخدر
خبّئيني.. من القمر!
وجه أمسي مسافر
ويدانا على سفر
منزلي كان خندقا
لا أراجيح للقمر..
خبّئيني.. بوحدتي
و خذي المجد.. و السهر
و دعي لي مخدتي
أنت عندي
أم القمر؟!










Friday, December 4, 2009

على هذه الأرض ما يستحق الحياة






على هذه الأرض ما يستحقّ الحياةْ: على هذه الأرض سيدةُ
الأرض، أم البدايات أم النهايات. كانت تسمى فلسطين. صارتْ
تسمى فلسطين. سيدتي: أستحق، لأنك سيدتي، أستحق الحياة.
محمود درويش



ما اللذي كان يجول بخاطر محمود دريش عندما كتب قصيدته "على هذه الأرض ما يستحق الحياة" ؟؟
أكان ينوي الأنتحار؟!! ثم أحس بوجع الوطن المسلوب!!
أظنه أحس بضياع الوطن, بوجع القضية, بوجع الأم الفلسطينيه! ففضل أن يبقى على قيد الحياة!! كي يعزينا بأنفسنا !! لكن خانته الحياة و مات قبل أن يرى ما حدث في غزة!


 فلسطين سيدته و سيدتي و سيدة كل من يجري في عروقه لحن الحرية!!
و اقول كما قال محمود درويش:
"ايها المارون بين الكلمات العابرة
منكم السيف - ومنا دمنا
منكم الفولاذ والنار- ومنا لحمنا
منكم دبابة اخرى- ومنا حجر
منكم قنبلة الغاز - ومنا المطر
وعلينا ما عليكم من سماء وهواء
فخذوا حصتكم من دمنا وانصرفوا"


والسلام









Thursday, December 3, 2009

من يهن يسهل الهوان عليه


بدون تعليق

أحد اليهود وصف العرب بأنهم يدّعون الشرف!! و يصفون انفسهم بأنهم شرفاء!! و لكن تختلف الأمور عند النقود!! فيبيعون انفسهم مقابل المال او المركز!!

حديث عبد الله بن عمر أن رسول الله صلى الله عليه وسلم قال: إذا تبايعتم بالعينة، وأخذتم أذناب البقر، ورضيتم بالزرع، وتركتم الجهاد سلط الله عليكم ذلاً لا ينزعه شيء حتى ترجعوا إلى دينكم

الدنمارك نشرت رسومها
اليهود يهدمون المسجد الأقصى

و العرب !! نائمون!!

قال الشاعر : من يهن يسهل الهوان عليه              ما لجرح بميت إيلام

تعودنا على الذل والمهانة!!

اتمنى ان يستيقظ العرب !!

Wednesday, November 25, 2009

تاكسي!!




سواقين التكاسي في هالبلد مشكلة كبيرةَ!! نصهم مدراء و النص التاني وزراء!! وقت الأزمه بطلعوش حد!! و بالليل بدون عداد!! و اذا واحد تكرم و وقفلك بحملك الف جميلة! و بضل يسب عالناس اللي بالشارع عشانها بتعرفش تسوق و هو السوييق الأول و الأخير يخزي العين!! بعدين اكتر شي بسبوا عالبنات!! ليش؟! شو عاملينلهم البنات!! الله اعلم!


اشكر جهود اللي عملوا التكسي المميز!! بس الله يسامحكم كان عملتوا ألأجرة زي اجرة التاكسي المش مميز!! بلكي تربوا شوي!!
لازم يتربوا عشان يعرفوا ان الله حق!!
نص ساعة و انا واقف بالشارع بستنى بتكسي محترم يجي يوصلني !! مر 10 فاضيين !! اللي بدوش يطلّع حد! واللي بدو يوديني محل ما هو منقلع!!
الله بعين!!

Saturday, November 21, 2009

طمنوا ستي ام عطا - تميم البرغوثي

طمنوا ستي ام عطا بإنه القضـية من زمان المندوب وهي زي ما هية
لسـة بنفاصل القنـاصل علـيها زي ما بتفـاصلي ع الملوخـية
لكـن اطمـني وصـلنا معاهم بين ستة وستة ونص في الميـة
بطلـع لهم يا ستي حيـفا ويـافا ولنا خرفيش وسيسـعة بـرية
ولنا دولة يحرسـها طير السـنونو يا ام عطا ولبسوه رتب عسكرية
والسنونـو إله نمو اقتصـادي والسنونـو إلـه خطط أمنـية
والسنونـو عم ينبذ العنف ويعلن إلتزامـه الكـامل بالاتفــاقية
ولنا برضه يا سـتي سجـادة حمرا تالسنونـو يأدي عليها التحـية
والنـا قمة يدعـو إليها السنـونو يعقدوها في الجامـعة العربيـة
حيـوا برج الحمام وحيوا حمامه من ملوك المحبـة والأخــوية
يا حمـام البـروج ويا مواليـنا يا دوا الجـرح ويا شـفا البردية
يا شـداد الخطـر على أعـادينا وحبكو إلنا حب قيـس للعامرية
راح أقول اللي قالوا طوقان قبلي أخو فدوى وبن الأصول الزكية
في يـدينـا بقيـة من بـلادٍ فاستريحوا كي لا تضيــع البقية

Thursday, November 19, 2009

كره بكره


اسألوني شو بتكره؟ و ليش؟ بكره المشاكل خاصة مع عمامي!!


بس احيانا الواحد غصب عنه بتمشكل او بتمشكلوا معه!! و على مواضيع أنا صاحب القرار فيها!!


بكره سياسة الأمر الواقع!! و لو واحد حاول يتبعها معي لو على رقبتي ما بمشيله إياها!!


بكره حد يستخدم أغراضي!! أو يقعد على سريري!!


بكره حد يتبلى علي!! و يحكي حكي ما صار و يكبر الموضوع و يصير موضوع على مستوى عالي و هو كلله موضوع تافه جدا!!

كنت مبسوط اني رح اعيد مع اهلي!! بس خلص يا ريت ما حجزت!! و يا ريت رديت على مديري لما حكالي اطلع عيّد في عُمان!!

لأني مش رايح عالأردن اعيد! رايح احل مشاكل تافهه!! و بالعربي احط حد لهالمهزلة!!


Tuesday, November 17, 2009

و كل تأخيرة فيها خيرة


طبعا هادا المثل مش موجود غير عند الأخوان العرب! أما المش عرب فش عندهم لا تأخيرة ولا بطيخ مبسمر!

و انا من ناحيتي ما شفت تأخيرة فيها خيرة أبداً!!

مثلاً أنا لازم أغادر أرض الأمارات قبل 26/11 يعني بعد 9 و بما انو العيد عالأبواب و من اسبوع انا محدد موعد سفري ب 23/11 عشان فش مجال بعد هيك ولا قبل هيك! و من اول ما وصلت هالبلد و انا صوتي مبحوح من كتر ما حكيت "استعجلولي في موضوع الفيزا" لأنو انا جاي على فيزت فيزا! و انزنقنا بالوقت و تعقدت الامور و صار في مشاكل عالفيزا اللي اليوم بلشوا فيها!! لو اني عامل "هندي" كان ما صار مشاكل! الله بعين!

و كل تأخيرة فيها خيرة! :)

Monday, November 16, 2009

توب سيكرت


بعرفش ليش العالم بحبوا يحكوا على بعض كتير!! طبعا ما بخللوا عيوب في الناس الا بحكوها!! و اذا مش ملاقين عيوب يحكوها بخترعوا عيوب! او بحولوا المش عيوب لعيوب!

هو اكيد مش كل الناس! الغالبية العظمى!!

طبعا انا صرلي 20 يوم في الأمارات! و عرفت عيوب كل اللي بشتغلوا معي بس المش عيوب لسه ما عرفتها لأنه الناس ما بتحكي فيها!! لازم اكتشفها لحالي!!

بشكر الله اني في قسم كله هنود و انا العربي الوحيد في القسم

بحكولي الله يعينك كل قسمك هنود !! مالهم الهنود؟؟ بحكوش كتير! بس بهزوا روسهم!!

احسن شي :)

Sunday, March 22, 2009

شي بضحك!




جد شي بضحك!! مش عم بقدر استوعب انو انا صرت (حرامي) فجأة!! بجوز اني سرقت و انا سكران! مع العلم انو انا ما بسكر! او بجوز و انا نايم! مع اني ما بمشي و انا نايم! لسة ما وصلت لهالمرحلة!

لأني بحب شغلي و بتأخر فيه و لو يصحللي انام في المكتب ما بقول لأ!

مش لأني ما بعبرك و ما بستنضف اسلم عليك يا (رت) تتهمني بالسرقة! انا ما بعبرك لأنو نفسيتك محمضة و شايف حالك! و انا كمان بعرف اشوف حالي! لأني اشرف منك و من كل آل ت الكرام!

كل واحد بشوف الناس من مرايته اللي بشوف حالو فيها!! و الحرامي بفكر كل الناس حرمية!!

مش محرز احكي عنك اكتر من هيك!! كلك على بعضك ما بشيلك من ارضك!!

روح منك لله!

حسبي الله و نعم الوكيل فيك!

Friday, March 13, 2009

مثلهم تماما


أنا لست بنادم على حبك سيدتي - لا - و ليس بالشيء الصعب نسيانك!!

اقنعي قلباً غير قلبي بحبك ليس آبه بشكلك الجميل!!نظر إليك العميان فقالوا: منذ متى تمشي الشمس على الأرض!!يا للمساكين... لم يتعدُّوا حدود النفس و حلموا بالقشور التي ترتدين!!ولو أنهم اخترقوا جدران تكبرك لرؤا الجحيم!!استغليت سذاجة قلبي و بدأتي التلحين.. ألحانا ساحرة مسكرة شديدة الرنين!!رسمتي كأعظم فنان تخيلات لمستقبل حلو السنين!!لم تعشقي قلبي بل جسدي ما كنتي تبتغين!!و لو أنك عشقتي قلبي لجعلتك مليكة عليه تتربعين!!لنسجت لك خيوطا من سحاب.. و ثوباً من نور جعلتك تلبسين!!لكنك خسرتي عزيزتي و مفتاح قلبي ما عدتي تملكين!!لقد كنتي حبيبتي (( مثلهم تماما)) وراء شهوتك تركضين!!








A.Merie