Saturday, December 5, 2009

رجعتلي الروح



ماكل هوا!! مفلوز مع اني كل 10 سنين بفلوز مرة!! بس اذا فلوزت بتوفى.. سلامتي.. بعيد الشر عني :)

مش موضوعنا.. موضوعنا اني اشتقت كتير للمطر! شعور غريب بصيبني بس اشوف الدنيا بتشتي.. لا شعوريا دموعي بتنزل زي المطر!... مش عيب الرجال تبكي! كنت لما ابكي و أنا صغير يحكولي الرجال ما بتبكي!! عيب!!

طبعا مش كل ما تشتي الدنيا ببكي!! حسب الوضع العام و الخاص!!
لازم اكون لحالي و الدنيا عتمة و ضو الشارع عاكس على المراية اللي بغرفتي و مدد بسريري و بيتنا يكون فاضي!
كأني كتير اشتقت لغرفتي كمان!
و اشتقت لأمي و هي بتصحيني الصبح ! لأروح عالشغل! طبعا طول عمري مغلبها لأمي و بكل شي! و طول عمرها بتصحيني الصبح و بتتغلب و هي بتصحي فيي!!
"يا أحمد قوم يا ماما النسكافيه تاعك برد!" طبعا هاي اكتر جملة سمعتها بحياتي:)
كنت مفكر بسفرتي اني ريحت امي من غلبتي! على فكرة أنا غلباوي كتير.. بكل شي بغلب! بس لما رجعت عالأردن عشان موضوع الفيزا سمعتها بتحكي لصاحبتها عالتلفون "لما رجع أحمد رجعت روحي معه!" و يا ريتني ما سمعتها!! الله يخليلي اياكي يا احلى أم بالدنيا..
و يخليلكم امهاتكم يا رب..
و اشتقت كمان لشغلي القديم.. و اشتقت لمخانقاتي مع مديري العزيز:))
و اشتقت كمان لأصاحبي اللي كانوا فاضحينا وين ما نروح:)
و بما إني مشتاق و مشتاق ... أشتقتلكم انتوا كمان:)

 



7 comments:

  1. جميل هو الشوق .. متعب بعض الشيء لككنه يرسم روعة اللقاء بعد طول غياب
    و رائع هو المطر فبإمكانك ان تشكل دموع السماء دموعا تواسيك لحزنك او تشاركك ان كنت سعيدا .. جميل هو المطر حين الشوق فكلاهما لا يأتيان كثيرا و حين يأتيان لا يغادران الروح بسهولة
    و سلامات على الانفلونزا و انا أيضا أعاني منها و بشدة هههه ..
    كلام جميل و ان شاء الله ما تفارق عزيز متل بيقولو

    ReplyDelete
  2. Farah

    el shou2 jameeel bs s3b shway sometimes..:)
    o el matar ra2e3.. bekafe el mashe ta7t el matar ka2enno shower lal rou7!

    o ente kaman salamat la elek o be halmonasabeh hay 7abeb a7keelek.. hatsooo... lol..

    teslame en sha2 allah ma betshoofe youm fraa2 ya rab:)) o tkon kol ayamek leqaa2 be leqa2:)

    ReplyDelete
  3. اولا سلامااات يا مان..ان شاء الله تكون هلأ احسن :)

    الله يخليلك خالتو و يخليلها اياك
    والله يخليلي مميتي يا رب اللي كتير اشتقتلها و مع قرأه كلامك حسيت حالي بدي ابكي :(

    المطر بجنن, انا زمان ما كنت احبه بالمره لكن الي سنتين بعشق المطر مش فاهمه كيف :)

    ReplyDelete
  4. Whisper allah ysalmek ya rab o etdalle salmeh
    o y5aleelek emmek o ma ye7remkom men b3d ya rab
    o terja3lek belsalameh ya rab
    ba3tazer eza daya2tek bshee belle katabto o ma asde enno tebke ya whisper:((

    me too wallah men jdeed sort a7eb el matar.. aw e7na lama nekbar benseer en7ebbo.. o e7na s3'aar kan elmatar ye7besna fel bait o ma ne2dar netla3 nel3ab "6omayeh:P" la haik konna nekraho

    ReplyDelete
  5. زيارتي الاولى للمدونة
    الشتا هو روح الارض ورحمة ربنا لعباده
    والشوق هو سر القلوب ولسان حالنا الصامت بالغياب
    حكمة ربنا انه لما نبعد نحس بقيمة الاشياء بتكبر جوانا
    بس معو معو رح بتشوف الوان مختلفة ورح تتعلم بكل يوم شي احلى واجمل

    تحياتي

    ميساء

    ReplyDelete
  6. أهلا و سهلا ميساء نورتي المدونه:)
    "والشوق هو سر القلوب ولسان حالنا الصامت بالغياب "
    تعبير جميل جداً!!
    و كلامك رائع
    و شكرا على مرورك:)

    ReplyDelete
  7. Ahmad!!! betdamerny enta!! ;)
    allah y5alelak emmak w yraj3ak elha bl salameh yaaaaaaaaaaaaaaaaaaaaaaaaa rab :))
    w BTW ana b7b el matar kteer coz batzakar nas b7bhom w ba3ezhom kteeer ,, zy b3d nas :PP ;)

    ^^noon^^

    ReplyDelete