Thursday, December 31, 2009

Four Seasons

اللي بعرفه انه البني آدم بمر خلال اليوم  أو خلال فترة من الزمن بـ"أربع فصول"
و اللي بعرفه أنه ما بنحكم على أي بني أدم أنه منيح أو عاطل إلاّ بعد ما نشوف أكتر فصل بطول عنده!
يعني ممكن فصل الشتاء يكون أطول من الصيف عنده! حسب تفكيره هو و الطريقة المأسس عليها مخه!

عشان أبسط الصورة بدي أذكركم بهالقصة:
 هاد في زلمة عنده أربع شباب حب يعلمهم انهم ما يحكموا على الأمور بسرعة!
فبعت كل واحد فيهم عند شجرة وحدة بس كل واحد بفصل
يعني الأول راح بالشتاء
التاني راح بالربيع
التالت راح بالصيف
و الرابع راح بالخريف!
و بعد ما كلهم راحوا و رجعوا , جمعهم الأب و سأل الأول (اللي راح بالشتاء) شو كيف كان وضع الشجرة؟!!
رد عليه: والله اسكت هالشجرة بتخزي!! ناشفه و مايلة و حالتها حالة!!
و سأل التاني (اللي راح بالربيع) : و انت يا عاهه كيف شفت الشجرة؟
رد عليه: ييييي اسكت بتجنن ! مزهرة و خضرة!
و سأل التالت(اللي راح بالصيف): و انت؟!! احكيلنا كيف شفت الشجرة؟
رد عليه: ابييه ضلليت قاعد تحتيها و الهوا بياخد العقل و هي خضرا و ريحتها بتجنن!!
و سأل التالت(اللي راح بالخريف): و انت يا مشطوب دورك احكيلنا شو شفت؟!
رد عليه: والله يابا الشجرة شكلها كان كتير حزين و مصفرنه!

كلهم شافوا نفس الشجرة بس كل واحد شافها بمزاج غير عن التاني!!
و هيك الناس!! ممكن يكونوا مرة زعلانين و مرة معصبين و مرة مبسوطين و مرة حالتهم حالة! حسب الـ "Mood"!
و برضه احنا مو لازم نعلق الآمال على الأشياء اللي بتصير معنا!!
اليوم نكد  و بكرة أنكد بس إلاّ ما يجي يوم يكون مش نكد!!

المصيبة في الناس اللي فصول السنة عندها كله شتا و خريف!! الله يعينهم!!



4 comments:

  1. رائعة...
    المشكلة انه في ناس ما بتحب يشوفوك الا بالربيع أو الصيف بس مش بايدك الموضوع...أنا بحسد الانسان اللي بيقدر يطلع دايما من همومه و مشاكله ويعيش أيامه كلها ربيع...الله يخليلي الحج و الحجة

    ReplyDelete
  2. الله يخليلك الحج و الحجة يا رب
    و اضافة للمشكلة اللي ذكرتها احيانا بنفرض علينا ناس نعيش معهم مثلا زي وضعي و وضعك السكن مع ناس في الغربة! هدول الناس مش كلهم اكيد.. ما عندهم استعداد يفهموا انك انت عمرك 28 سنة و متعود انك تحكي بطريقة معينة من 25 سنة على افتراض انك بلشت تحكي من عمر 3 سنين و بدهم اياك تحكي بالطريقة اللي بتريحهم!!
    زي في شبين معي, واحد متدين جدا و واحد بصلي بس احيانا بسب دين الدراهم مثلا!! او التلاجة!! الشب المتدين بقلبها نكد!! و هات اقنعه انه هو هيك طريقة كلامه!! مع العلم انه دايما بتفادى انه يحكي هيك حكي قدامه! بس احيانا بتفلت جملة بدون قصد!!

    ReplyDelete
  3. كتير اعجبني التشبيه :)

    اكيد ما في حد بنفس المزاج 24 ساعه , و باعتقادي انك تكون ربيع على طول راح يكون اشي ممل ...يعني تخيل انك بتتعامل مع انسان دايما مثالي ودايما سعيد ...انا شخصيا ما بحب اتعامل مع هيك شخص, بتفرفط روحي لازم يكون شويه اكشن شويه جنون سلبي او ايجابي اشي يكسر الروتين :)

    احلى شي التوازن و الوسط بكل شي, مبسوط بحد و زعلان بحد ومعصب بحد و حزين بحد ...صح؟؟

    ReplyDelete
  4. كلامك 100% مزبوط:)
    مثلا انا في عندي فصول لسة مش ملاقيلها تسمية:)
    ممكن أسميها شتاء مخرفن!! أو ربيع مصيف!!
    و بالساعة بمر ب7 حالات!
    مجنون رسمي!
    أو ممكن زي ما بسموني أصحابي(العاهات) King Of 3ahat
    LOL

    ReplyDelete