Sunday, February 28, 2010

Money is Talking


شارع الشيخ زايد

صارلي 4 شهور في هالبلد!! ما شفت ولا شحاد!! لا على اشارات و لا في داون تاون ولا اي محل!!
بس شفت حالة شحدة غريبة!! واحد بشحد شغل عال CV!! .. فلوس ما بياخد بس بده يشتغل!!
انه ما حد يحكيلي فش فقرا!! بس في نفس عزيزة!! اذا كانوا شحادين الأردن من أصل فقرا!!
اتمنى ما نشوف شحادين ولا بأي شكل في الأردن!!

علاوة مواطن!! مصطلح حلو أنه ابن البلد بياخد راتب مختلف تماما عن ابن المش بلد!! ضعف او ضعفين مش عارف!! و دايما الأولوية للمواطن!!

الشي اللي ما عجبني انه الأوربيين معاملتهم احسن منى مع انه احنا عرب في بلد عربي!! هو بياخد الفيزا في المطار!! ختم على جوازه و هو جاي!! و احنا لازم نستنى الفيزا لتطلع!!

بس مع هيك بضلوا أرقى منا في كل شي!!
مع انه احنا ثقافتنا أعلا!!!
Money is Talking

Tuesday, February 23, 2010

أنا داري؟!

في مجال أكون صريح شوي؟!


عمري صار 28 سنة... لهلأ ما لقيت واحد بفهمني..!
يمكن لأني بتعامل مع الناس بشفافية؟؟
أو ما عندي خباثة؟!!
أو ما بعرف أجامل أو ألف وأدور؟!!
أو ما بعرف حتى أكذب؟!!
و هالأشياء كلها صارت أساسية في تكوين البشر هالأيام؟!؟! و اللي ما عندو أياها يا بكتسبها يا راحت عليه؟ قانون الغاب؟؟؟؟؟؟؟؟؟
أنا حتى لما بدي أختار (Nickname) ما بزبط معي إلا اسمي!!؟!
هاد الشي غلطت هالأيام!! و كل ما أحاول أتعامل بخبث بتزبطش معي!!
بعرف أنو مش مكان مناسب للواحد يحكي هيك حكي فيه!! بس إذا ما فضفضت بنفجر!!
سامحووونا!!

Sunday, February 7, 2010

في ساعات الصباح الباكر!

"يا جبل البعيد,, خلفك حبايبنا,, بتموج متل العيد.. و همك متعبنا"


 الباص فل!! بجوز كان فيه 44 راكب و هو باص ل 22 راكب بس!!
و أنا واقف عند حبيبة اللي على دوار الواحة كالعادة و الساعة 6:10 الصبح.. و بنت الجيران اللي كانت كل يوم تحكي صباح الخير و فجأة بطلت بعرفش ليش!! رايحة جاي بتستنى هالباص ليوصل و يطلعنا!! و الجو برد! و هالبنت الحزينة نشفت من البرد! كل  شوي تمسك الموبايل و ترن على "تحسين" (سواق الباص) : آه تحسين وين وصلت؟! و هو كالعادة "يالله 5دقايق و بصل.. أبو مرعي واقف معاكي؟؟" بسألش عني محبة فيي طبعا! محبة في ال 3 دنانير اللي رح يضمنهم بوجودي.. بما انه طبعا نص البنات طالعين معه في بلاش و غير النسكافيه و الشبس اللي بشتريلهم اياه عالطريق!! أنا أحيانا بطلعلي كاسة نسكافيه بما أني صارلي 4 سنين في خلقته!!
و بوصل الباص مستعجل بده يلحق يوصل جسر مأدبا قبل ما تصحى أول دورية من الدوريات الخارجية عشان ما يدفع مخالفة لأنه مخالف كل شي أصلا!!
"يالله يا فلانه يالله يا ابو مرعي تأخرنا على محاضرة الساعة 8!!" صوت واحد من الشباب اللي بشتغلوا كونترولية على هالصبح برضو عشان ما يدفع هالتلات دنانير!!
بطلع في مكاني اللي كان معهود أول كرسي جنب الباب و بحط راسي و بحاول أكمل نومتي بس للأسف بتزبطش من كتر ما هو صوت فيروز ملعلع في الباص و قر البنات و برم الشباب!! أما اللي ساكتين هدول بكونوا صفنانين في بعض و مش ماخدين على هالوضع يا انهم لسة سنافر أو أعتزلوا عالم السكنات من جديد!!
بتخلص فيروز و بحول السيد "تحسين" على محطة فن اف ام عشان يقرفنا في برنامج بصراحة مع الوكيل!!
و أنا لسة صاحي و مش صاحي!!
و بس نوصل الطريق الصحراوي بصحصح و ببلش انكش مخاتي عاللي بعرفهم في هالباص!! طبعا تقريبا بعرف الأغلبية في هالمكوك الفضائي اللي ماشي قصدي اللي طاير على سرعة 180!! ما أحنا كل يوم في خلقة بعض في الجية و الروحة!! زي طلاب المدارس!!
الله يسهل على هديك الأيام!! كانت من أجمل أيام حياتي!! مع كل سيئاتها!!

أحمد مرعي



Saturday, February 6, 2010

توب سيكرت 2

صارلي فترة عم أفكر استقر و أرتبط و اتنيل على عيني..
الفكرة انو امي بتلح كتير و بدها اتضلها تلح و تلح.. بعرفش ليش هلأ فطنت تلح!!
و كل ساعة بترنلي (دولي طبعا مقوية قلبها) شفتلك فلانة و منيحة و مش عارف شو!
طبعا أنا بكره أي شي تقليدي!! فبحكيلها لا هي بعرفها حولة .. أو عرجة أو اي شي! مع اني لا بعرفها ولا عمري شفتها و لا سمعت عنها!! ...
و انا من ناحيتي بلشت ارجع بذكرياتي و استرجع مين كنت اعرف بنت منيحة بتستاهل الربطة!! ما هو اللي عليك عليك!! يا بترتبط ربطة زي العالم و الناس يا بلا منها كلها!!


طبعا اللي اكتشفته أنو مش بس الشباب بحبوا يلعبوا و يتسلوا!! و البنات كمان عندهم نفس الهواية!!


اللي بتحكي انا نش مفكرة ارتبط هلأ!! و اللي انا في حدا بحياتي و بنحب بعض.. و اللي متنيلة على عينها و كانت في علاقة و مش قادرة تنسى!! و اللي حلقتلي عالناشف!!


سامحوني انا قصدت فئة من البنات مش كلهم!!
سلام!!