Sunday, September 12, 2010

في المطار



الشرطي: ممنوع!!
أنا: شو الممنوع؟
الشرطي: إنك تسافر! الشباب اللي تحت سن الـ40 مسموحلهم يسافر سياحة بس!! و انت من جواز سفرك واضح إنك مقيم في الخارج!
أنا: و شغلي؟!
الشرطي: ما بتابع أخبار إنت؟
أنا: لأ كلها بتسم البدن، ليش أتابعها؟
الشرطي: ولا بتقرأ جرايد؟
أنا: ما حكينالك إنه الأخبار بتسم البدن!! و ما بتابعها و لا بقرأها!
الشرطي: الحكومة أعلنت إنها رح توفر وظائف لكل الشباب!!
أنا: بـ250 دينار؟!
الشرطي: شكلك جد ما بتابع أخبار!!
أنا: ليش عم أمزح معك؟
الشرطي: أقل راتب 1000 دينار و هاد للي ما عنده خبرة!
أنا(مندهش و مزبهل و مش مصدق): معقول؟!!!!
الشرطي: هاد غير إنه متزوج أو عزابي! الحكومة قررت إنها تقدم مساعدات لكل المقبلين عالزواج!! و اللي متزوجين إلهم رواتب غير!
أنا(لسه مندهش و مزبهل و مش مصدق و مصدوم): و اللي عنده خبره؟!
الشرطي: حسب الخبرة, فممنوع!!
أنا: ممنوع ممنوع:)

أحمد؟؟! بعدك نايم؟! يالله إصحى!
طبعا هاد حلم يقظه!!
معقول يصير عنا هيك بالأردن!
أخ بس!!
يا ريت!

Thursday, September 9, 2010

سموك مسحر؟ خلص رمضان



تقبل الله طاعاتكم كل عام و انتم بألف خير و عيد سعيد للجميع:)
ينعاد رمضان عليكم بالخير و الصحة و السلامة.. شهر العبادات و الكفر تشارج و الشحدة!!
مع التفنن بأساليب الشحدة في الأردن بس اسلوب هالشحدة "مغصني"!!
إنه واحد يمتهن مهنة مش مهنته لمجرد الشحدة بس!!
زي.. يرن جرس البيت، تفتح الباب، أنا مسحراتي الحارة!!
كل سنة بسمع صوت طبلته إلا هالسنة، فش مسحراتي عنا بحارتنا!! شكله اعتزل أو ما وفت معه القصة!
المهم إني ما سمعت صوت الطبلة نهائيا!!.. دج خبطت الباب!!
فش شوي ولا برن الجرس!! فتحت الباب!!.. شاب طول بعرض.. لابس برتقالي.. كل عام وانت بخير أنا زبال الحارة!!
شكيت في الموضوع،، ناديت إمي.. ماما تعي إحكيلي اللي عالباب هاد عامل النظافة اللي بحارتنا ولا لأ!!،، إمي حكتلي لأ.. مو هاد هو!! هاد أول مرة بشوفه!! دج خبطت الباب!!
يا جماعة والله إحنا مش هبل!!
بكفي حرمنه!! هاي اسمها سرقة عالمكشوف!! و نصب!!
الله يستر من اللي جاي!!
الله بعين!!

Wednesday, September 8, 2010

خواطر

خواطرها حلوة.. و بتستاهل انه عالأقل نقرأها.. فش داعي نحفظها هههههههه ..
اتذكرت ايام المدرسة.. احفظ خمس ابيات من القصيدة اذا مش كلها:)
طبعا من باب الصدفة انه اسم عيلتها زي اسم عيلتي.. و هاد شي بشرفها.. قصدي بشرفني P:

أُقدم لكم الكاتبة


أتمنى أنه يعجبكم شي من كتاباتها

و دمتم

Tuesday, September 7, 2010

Cover Charge


أولا رمضان كريم و كل عام و كل عيد و انتوا بخير:)
العطلة جميلة جدا!! و الأجمل النوم اللي عم انامه.. طول النهار نايم و طول الليل صاحي!! كافي خيري شري!!
طبعا انا من الناس اللي بستشروا(بصير شرير يعني) و هما صايمين..!! حاولت انه ما استشر!! ما زبطت معي!! اكيد ما بحمل الناس جميلة اني صايم!! و جربت صمت 10 ايام و مسكت حالي قد ما اقدر!! الا ولكن فشلت !! عشان هيك قررت آخذ اجازتي قبل موعدها و اجي اصوم بالأردن!! فبنام طول النهار!! بصحى اصلي و برجع انام !! سواء نمت او ما نمت!! المهم اني عازل حالي عن الناس!!

طبعا بعد الفطور "تدريجيا" برجع للوضع الطبيعي!!
بطلع مع صحابي بقعد في كوفي شوب!! بندفع ضريبة المبيعات و الكفر تشارج و بدل الخدمه و بنرَوِّح!!!
كل شي حلو و بجنن إلا هالكفر تشارج و الضريبه و بدل الخدمة!!
فش مجال يضيفوا الضرايب تاعتهم عالسعر؟!! و يصير السعر اللي عال(menu) هو الي يندفع بس؟!!
طيب ضريبة المبيعات و امنا بالله و بدل الخدمة ماشي!! و الكفر تشارج اللي طالعينلي فيه برمضان لشو بالزبط؟!! انه ليس يعني!؟!؟!
حد علمي انه هالقصص بس موجوده عنا بالأردن!!
الله أعلم!!