Saturday, March 12, 2011

فرصة؟



بعد رجعتي من دبي... صابني حالة من الإحباط!! ... و  تبعت نفسيا و ضعفت.. .. وأكلت هوا ماديا و أعلنت أفلاسي و اللابتوب خرب و معيش أصلحه و ييييييييي الحمد لله على كل حال.. و كإني لسة متخرج من الجامعة و عم دور على شغل.. بس معي خبرة..!! أقعد من الصبح أطلع أدور على شغل.. أوزع CVـيات.. أرجع عالبيت أفوت على موقع أخطبوط و بيت أدور على شغل .. أبعت CVـيات .. أعصب.. أنرفز.. تنسد نفس عن الأكل.. أدخن.. أتداين.. أسهر .. أنام بكير .. آكل بشراهه.. أتنكد... أضحك.. أصحى متأخر.. أصحى بكير..  أطلع مع صحابي.. بنص الطلعة أروح... أنا مش أنا.. لا أنا أنا.. ولا مين يعني؟! و أستمر الوضع ست شهور!!
بعد ست شهور... 
أجاني  صاحبي حابب يفتح شغل خاص و حابب أنا أستلمه بما انه مش فاضي و بشتغل.. عرضت عليه أفوت شريك.. رفض.. بحب الإستقلالية! فاتفقنا على انه شو ما بيجي ربح للمكتب إلي النص! و ما إلي دخل بالمصاريف..! و توكلنا على الله و فتحنا المكتب!!
و كان أول زبون ببيعه فندق 5 نجوم!! بعد سبوع من الإفتتاح.. و صار زبون دائم هالفندق..  يعني كل فترة و فترة يطلب طلب!! شو بطلب صحيح؟؟ أكيد بطلب أشياء متعلقة في مجال المكتب اللي هو لوازم كومبيوتر.. مش مهم!!
المهم.. بعد شهرين من العمل!! برجع عالمكتب بعد لفة بالشوارع بحثا عن زباين جداد.. بلاقي عالكاشف رقم الفندق انه متصل و انا مش موجود.. بتصل في الشخص اللي دايما بحكي معي.. بحكيلي انه مش هو اللي متصل و انه لو بده أياني كان اتصل فيي عالموبايل!! طب مين؟! تاني يوم نفس الشي.. نفس الرقم عالكاشف و نفس الحوار.. خطر في بالي أنه اللي اتصل هو مدير مشتريات الفندق.. فقرت أجرب احكي معه.. ألو مرحبا استاذ فلان.. أنت اتصلت فيي شي؟؟ أهلا أحمد! أنت وين بتغيب و بتحكي عدولي؟! بدي أزورك في المكتب وين مكتبك؟ أعطيته العنوان و أجا!! و معه مدير مشتريات فندق تاني.. 
و هون بللشت حيرتي!!
بدهم احنا التلاته نفتح مكتب لخدمات الفنادق.. Katering يعني!! و كل شي بلزم الفنادق.. و نكون احنا التلاته شركاء بإدارتي!!
و أنه الزباين مضمونين و في بيعات و الحركة نار ..! و حكي كتير!!
أنهم فاتحين شركة فاتحين .. سواء كنت معهم أو لأ!! بس هم حابين أكون معهم!! لأنه حاسين أنه انا مصدر ثقة!! و صعب هالأيام تلاقي اللي يشعرك انه هو محل ثقة!!
وانه أنا رح أكون شريك و موظف براتب!! و رح  اسافر  عشان "أخلص ديل" مع ناس برة!! و كل شغلنا مع فنادق !!
و حكي كتير!! 
و صاحبي كان موجود و سمع الحكي... و كان تعليقه عالموضوع... يا معي؟؟ يا معهم!! معنا التنين ما بزبط!!
همممممم أعطوني رايكم!!

Wednesday, March 2, 2011

حاكم ظالم؟!

"ليلة في ظل حاكم ظالم، خير من ألف ليلة بلا حاكم"...
قال النبي صلى الله عليه وسلم في الحديث الذي رواه مسلم:((يكون بعدي أئمة لايهتدون بهداي ولايستنون بسنتي وسيقوم فيهم رجال قلوبهم قلوب الشياطين في جثمان إنس قال ( حذيفة): قلت : كيف أصنع يارسول الله ؟ إن أدركت ذلك ؟؟ قال : (( تسمع وتطيع وإن ضرب ظهرك وأخذ مالك , فاسمع وأطع )) رواه البخاري ( 7084) ومسلم ( 1847) باب ( يصبر على أذاهم وتؤدى حقوقهم )


تسمع وتطيع وإن ضرب ظهرك وأخذ مالك , فاسمع وأطع!!!!
يعني: حاكم ظالم حرامي بس بسمح في أداء الصلاة و الزكاة و الحج و الصيام و الآذان و المساجد و كل العبادات لا تجوز معصيته و الخروج عليه من ناحية دينية!!
 من ناحية سياسية! الكل شايف كيف أمريكا و أوروبا بلّشت تتحول لحماة الشعب الليبي و الشعب المصري 
كيف؟
أمريكا و أوروبا أكتر من مرة بنسمعهم بحكوا "لا نية للتدخل العسكري في ليبيا"... "الولايات التحدة تقرب سفنها الحربية من الشواطئ الليبية"
ليش التقريب مادام مافي نية؟!!
ليبيا بلد غني بالنفط!! و إذا ساعدوا الشعب الليبي أكيد الشعب الليبي رح يكون لا حول له و لا قوة!!
ما عم أدافع عن القذافي أو أحاول إجهض الثورة الليبية!
بالنسبة للمصريين العالقين على الحدود الليبية!! و اللي ساعدتهم زي ما سمعت فرنسا!!
ممكن حد يفهمني شو مصلحة فرنسا في مساعدة العالقين؟ و ليش مافش ولا دولة عربية حاولت تتدخل في الموضوع؟!
كإنه أيام الإستعمار الغربي رح ترجع؟!!
كإنه عم نعمل ثورات في البلدان العربية عشان نشيل حاكم ظالم و نجيب حاكم أظلم منه أمريكا و أوروبا؟!
اللي قاموا بالثورات العشوائية كان هدفهم بس يشيلوا النظام الظالم؟ طب و مين بده يحكمكم؟؟؟؟ ولا المهم تشيلوا النظام و بس؟!
بصراحة؟ إحنا بخير!

مش فاهم!

المنطقة هالأيام.. "مْوَلْعَة!"... ثورات بتونس و مصر و ليبيا و اليمن و سلطنة عمان و البحرين و قطر.. قطر؟؟ و ..... مظاهرات شعبية في الأردن تطالب بالأصلاح و بلطجية تطالب بالفساد!!
طبعا كلنا بنحب الأردن و بدنا مصلحة الأردن.. و كلنا بنحب  الملك... و كلنا جنود " أبو حسين"
(((بس))) الشي اللي جد مش فاهمه.. البلطجية!! مين ما كنتوا تكونوا .. ما ظنيت أنكم بتحبوا مصلحة الأردن أكثر من أي حد تاني!!
بالعكس انا بنظري انتوا اعداء البلد! و أعداء الأصلاح و بدكم البلد خربانة!! لأسباب أهمها في اعتقادي مصالحكم الشخصية!
طبعا!! مصالحكم الشخصية اللي مبنية فوق مصلحة البلد!!!
بلا من التنظير و النفاق!.. كلنا أردنية و كلنا ولاد البلد! و كلنا بنحب الأردن!!