Sunday, August 26, 2012

حادث سير !!


ليلة العيد عملت حادث سير جدا بسيط! الأضرار بالنسبة إلي لا يوجد! و بالنسبة للشخص الأخر حسب ما ورد في "الكروكرة" 6 خدوش!
بس المشكلة إنه الحق علي! انا لمست سيارته من الخلف!! و المشكلة الأكبر انه التأمين و الترخيص خالصين بنفس اليوم!!
و المشكلة الأعظم انه الشخص اللي لمست سيارته شكله من أصحاب النفوس المريضة و منتهزي الفرص!
تحولنا محكمة عشان التأمين خالص و عشان هو ادعى اني مخربله الصندوق الخلفي! فتح و بطل يسكر!! و انه سيارته بدها "سحب بودي"!! و بده 100 دينار تصليح و للعلم نوع سيارته "كيا سيفيا 1995".

المهم الخميس اللي بعد العيد كان موعد المحكمة.. وصلت المحكمة و قعدت في النظارة من الساعة 10:00 صباحا للـ 1:00 بعد الظهر و انا انتظر في دوري!! و خلال هالقعدة عينك ما تشوف الا الوساطات!! اللي قهرني الوساطات!!

اذا الواسطة في أمن و امان البلد!! اللي هو الشي الوحيد اللي مو لازم يكون في وساطة!! اذا الك وساطة اقلها ما بتفوت عالنظارة لو شو ما كنت عامل! أما المسكين اللي ما اله واسطة عادي كله حادث سير أبسط من البسيط!!

المهم برضه عند القاضي الرجل تنح و رفع قضية حق خاص!

الله بعين الأمة على ما ابتلاها!!



Tuesday, February 14, 2012

Back Again


مرحبا؟؟ كيفكم؟؟
بعد غياب طويييل قررت ارجع أدون...

ما بدي احكي عن أحداث سوريا و مصر و اليمن و فلسطين و ليبيا و تونس و العراق و لبنان و  السودان و الصومال و الأرددددن و المعلمين و (المش!! متعلمين) و الحرمية و الفساد و ال و ال وال.. كتير أشياء بينحكى عنها بس انا ما بدي.. لأنه شي (بيفرحححح)!!!!
و لأنه الكل صار محلل سياسي و اقتصادي و اجتماعي و فش شي مخبا..

بس بدي احكي عن حالي و عن شو عم بصير معي و بدي بالعربي أفضفض!!!
لأنه بصراحة اكتشفت اني ما بعرف افضفض!! فااا بلكي عرفت أفضفض هون!!

اكتشقت مؤخراً انو بلشت أنسى كتير اشياء تعبت كتير لا حتى تعلمتها.. و اكتشفت اني عم اضيع وقت اذا ضليت بنفس شغلي اللي انا فيه لأني بصراحة مش عم استفيد لا ماديا و معنوينا.. بالعكس عم أخسر وقت!! .. و اكتشفت اني لااازم اتخذ قرار سريع جدا بالنسبة لهاد الوضع.. و أكتشفت اني عم انفصل عن صحابي القدام و اكتشفت اني نسيتهم او هم نسيوني!! و اكتشفت اني ... مش عارف.. نسيت!

على أي حال أكتشفت اني رجعت أدون و سامحوني على سمة البدن!!